ПИЛОТТЫҚ ЖОБА ТАЛҚЫЛАНДЫ

Өткен аптада Талғар қаласындағы дарынды балаларға арналған № 7 мектеп-лицейінде «Орта білім беруді жан басына қаржыландыру» жобасының тұсаукесері өтті. Шараға ҚР Білім және ғылым министрінің орынбасары Бибігүл Асылова және «Қаржы орталығы» АҚ президенті Асқар Ибраимов, сондай-ақ, пилоттық жобаны сынақтан өткізген Талғар ауданындағы №5, 14, 16, 49  мектептердің директорлары қатысты. Еске салсақ, осы жоба бойынша 2021 жылдан бастап мектептер жан басына қаржыландыру жүйесіне өтеді деп жоспарлануда.

«Жан басына шаққандағы қаржыландыру» пилоттық жобасы алдағы жылдан бастап  колледждерде, толық жабдықталған мектептерде енгізіледі. Ол бәсекелестік пен мектеп және оқу бағдарламасының сапасын арттыруға бағытталған. Жоба 2012 жылдың қыркүйегінде Президент Н.Ә. Назарбаевтың бастамасымен қолға алынды. Әдістеме ҚР Білім және ғылым министрлігінің 2013 жылы 30 қазандағы №440 бұйрығымен бекітілді. Осы жылдан бастап пилоттық жоба ретінде енгізіле бастады. Қазіргі таңда облыстағы 73 мектепте пилоттық жоба жүзеге асырылып отыр. 
Жан басына шаққандағы қаржыландырудың негізгі міндеттері – сапа мен бәсекеге қабілеттілігін арттыру және білім беру сапасын үздіксіз жақсарту үшін мектептің дамуына қолдау көрсету, оқушылардың оқу орнын таңдау мүмкіндігін кеңейту, мектеп автономиясының өсуі, бюджет шығындарының тиімділігін арттыру болып табылады. Талғар ауданына қарасты  №5, 14, 16, 49 мектептерде 4 жыл бойы жан басына шаққандағы қаржыландыру сынақ ретінде жүргізілген. Білім және ғылым министрінің орынбасары Б. Асылова Талғар мектептеӨрінде өткізілген сынақтың нәтижесімен бөлісті. Мектеп директорлары М. Бекбосынов, Н.Сапақова, А. Асанова, К. Мұхамеджановалар жобаның жүзеге асырылу барысы туралы еркін түрде әңгімелеп берді. Олардың айтуынша, мұғалімдердің көбі балалармен белсенді түрде қосымша сабақтар өткізе бастады. Соның нәтижесінде оқушылар аудандық, облыстық, тіпті халықаралық олимпиадаларда жүлделі орын алып, ҰБТ бойынша орта балдары артқан. Мұғалімдер оқушылардың рухани ой-өрісін дамыту мен танымдық жүйесін қалыптастыруда мемлекеттік қорықтар мен музейлерге апаруды дәстүрге айналдырған. Сондай-ақ, осы жоба аясында Қазақстан мен Ресейдің кәсіби журналдарына мақала жариялауды бастады. Басқосуда Т. Рысқұлов ауылындағы №16 мектептің директоры Матан Бекбосынов:
– Жан басына қаржыландыру мектептер арасындағы бәсекелестікті арттырып, ұстаздар қауымына тың серпін беретіндігіне сенімдімін. Мектеп ұстаздары білім сапасын көтеру үшін жаңа әдістерді енгізуге тырысуда. Төрт жыл аралығында осы жобамен жұмыс жасауға төселдік. Ұстаздарымыз бен оқушыларымыздың жетістіктері жеткілікті, – деді.
Аталған жобаның тиімділігін тілге тиек еткен жауапты мамандар мен мектеп басшылары бұл жоба оқушылармен қатар ұстаздардың да мәртебесін көтеріп, оның басты тұлғаға айналуына өзіндік ықпалын тиігізді деп келелі кездесуді түйіндеді.

Ұлбосын ИСАБЕК,

Талғар ауданы.

Оқи отырыңыз