Кәсіпкер ана

Тоқсаныншы жылдардың тоқырауы талай адамның тағдырын өзгертіп, мүлдем ойына келмеген шаруамен айналысуға мәжбүр етті. Ел ерге, ер жерге қараған шақта әйел-аналар мықтылығын байқатты. Базар жағалағаны сауда жасап, батылдары жеке кәсіп көздерін іздестірді.

Ауыл дүкенін ұстаған Тұрсын Акимова да жеке шаруамен айналысуды жөн көрді. Оған Алматыда тұратын әпкесі Еркежанның да ықпалы болды. Басқалар ауылдан қалаға қашып жатқанда алысты болжайтын Еркежан, керісінше, қаладан ауылға ат басын бұрды. Сағабүйен, Суықсай, Көшкентал ауылдарынан мың жарым гектар жер алды. Өзіне осы  ауданда тұратын және жер жағдайын жақсы білетін серік іздеді. Шаруашылық құру жайын Тұрсынмен ақылдасты.
– Дүйсен Ерденбеков деген жігіт бар, – деді  сіңлісі де  жақын адамына жанашырлық танытып. – Өзі біздің еңбек ұжымын басқарады. Жоғары  білімді агроном, өз ісінің нағыз шебері. Келіссе, одан мықты көмекші  таппайсың. 
– Бұл қызметтік көлік емес, сенің  жекеменшігің, – деді  Еркежан Дүйсеннің туған күнінде көлік сыйлап тұрып. – Ердің жасы елуіңде мінгізген «атым» болсын! 
Бүгінде өз ісін дөңгеленткен Тұрсын әпкесінің елжандылығы жайлы да жиі ойланады. Одан алған тәлімін қашанда өмір жолында ұстанады. Кәсіпкерлікті жүргізе жүріп, ел-жұрттың жайын да назардан қалдырмайтын. Тарихқа ерекше көңіл бөлетін. 
Еркежан нәубет жылдары жазықсыз жапа шеккендер жайлы көп ізденіп, толғанатын. Бірде ол – «Сағабүйен ауылында бұрын жетім балалар үйі болған деседі. Аудандық Қазақ тілі қоғамынан соның тарихын біліңдерші»,–деді. Іздестіре келе сол ашаршылық жылдардың зұлматын көрген кісілер де табылды. Зерттей келе аштан өлген балаларды ауыл белсенділерінің  жар жағасына көмгендігі белгілі болды. Еркежан аудан сәулетшісінің көмегімен  сол жерге белгітас орнатты. Сағакүрестегі ашаршылықта 90 бала қайтыс болған деген дерек бар. 
Бір кем  дүние... Әттең, сонда жолға шықпай-ақ қойғанда ғой. Тұрсынның әпкесі Еркежан Алматыға бара жатқанда жол апатынан қайтыс болды. Ауыр қаза Тұрсынның жанына батты. Енді оған өзінің «Дидар» жеке шаруа қожалығымен бірге әпкесінің «Темірлан» қожалығын да қоса алып жүруге  тура келді.
«Дидар» демекші, үлкен ұлының атымен аталатын    шаруашылығы да осал емес, аудандағы қуатты қожалықтың бірі. Көрсеткіштері ауданда алдыңғы қатарда.  Қамбасы астыққа, қорасы малға толды. Олар ауданда ұйымдастырылатын «Мектепке жол», «Кедергісіз келешек», «Қарттар күні» сияқты  шаралардың бірінен де тыс қалмайды. Оның үстіне, ел болған соң айтулы мерекелер де өтіп жатады. Құдайға шүкір, «Алаштың бар жақсысын жинап алған, атыңнан айналайын ағынды Ақсу» деп жерлесіміз Тұрсынзада Есімжанов жырлағандай, Ілияс, ақын Сара, Құдаш сияқты киелі Ақсудан шыққан дарындар қаншама?! Олардың мерейтойлары ауданның береке-бірлігін, бет-бейнесін көрсетіп жатады. Ондайда сан рет үй тігіп, республика мен облыстан келген қадірлі қонақтарды күтерде ауыл әкімі Тәңірберген Арғынбаевтың қасынан табылады. Думанды күндерде Тұрсынның ошағы маздап, қазаны көтеріліп жатады.
Ақсу бойынша соңғы жылдары  дәнді дақылдың әр гектарынан мол өнім алынды. Өңір несібесін арттыруда  Қарасу ауылдық округінен Тұрсын Акимова да бар. 
Үкіметтің «Жұмыспен қамту – 2020»  бағдарламасына сәйкес ауданда жұмыс орны ашылса алдымен жергілікті тұрғындарды жұмысқа алу мәселесі бірінші кезекке қойылған. Тұрсын да біраз адамды жұмыспен қамтып отыр. Жазғы науқан кездерінде олардың санын екі есеге дейін көбейтеді. «Темірлан» мейрамханасы мен  дүкенінде 8 адам тұрақты жұмыс істейді.
Еңбек адамы қашанда ел алдында. Абыройы асқақ, келбеті келісті Тұрсын Акимова қара нардың жүгін көтерген  қайыспас тұлға.

М. ҚАЗБАНБЕТОВ
Ақсу ауданы

 

Оқи отырыңыз