ҚАЗАҚСТАН 28-НШІ ОРЫНҒА КӨТЕРІЛДІ

ҚАЗАҚСТАН 28-НШІ ОРЫНҒА КӨТЕРІЛДІ

Қазақстан 36-ншы орыннан 28-ге көтерілді. Бұл - Қазақстан Үкіметі мен бизнес-қауымдастықтың бірлескен реформаларының нәтижесі. Биыл Дүниежүзілік банктегі рейтингке тұңғыш рет Үкімет мүшелерімен қатар «Атамекен» Ұлттық Кәсіпкерлер палатасы қатысты.

Doing Business рейтингі 10 тақырып бойынша жиынтық көрсеткіштерді өлшеу әдісімен жасалады, олардың әрқайсысы бірнеше индикатордан тұрады және жеке алынған елдің жалпы рейтингіне тең әсер етеді. Құжатқа сәйкес «Миноритарлық инвесторларды қорғау» индикаторы бойынша Қазақстан 1-орынды, «Келісімшарттарды орындауды қамтамасыз ету» индикаторы бойынша 4-орынды, «Құрылысқа рұқсат алу» индикаторы бойынша 35-орынды, «Кәсіпорындарды тіркеу» индикаторы бойынша 36-орынды иеленді.

Бір жыл бұрын Қазақстан кәсіпкерлік қызметті жүргізудің ыңғайлылығы бойынша 36-шы орында тұрған. Дүниежүзілік банкте Doing Business (Вашингтон қаласы) мәселелері бойынша өткен кездесуге Қазақстаннан ҚР Ұлттық экономика вице-министрі Серік Жұманғарин бастаған жұмысшы тобы барды. Жұмыс тобының құрамына «Атамекен» Қазақстан Республикасы Ұлттық Кәсіпкерлер палатасының басқарма мүшесі, басқарма төрағасының орынбасары Елдос Рамазанов кірді.

Қазақстандық делегация кәсіпкерлік қызметті реттеуді жетілдіру мәселелеріне негізделген заң шеңберінде жүзеге асырылатын, Қазақстандағы бизнес-ахуалды жақсартуға арналған реформаларды таныстырды. Doing Business рейтингінің 9 индикаторы бойынша еліміздегі 7 кодекс пен 20 заңға 148 түзету енгізілді. Барлық өзгеріс бизнес-қауымдастықтың ортақ пікірін ескере отырып кіргізілді. Doing Business көшбасшыларының алғашқы үштігінде Жаңа Зеландия, Сингапур және Дания бар. Ресей 31-ші орынға, Беларусь 37-ші орынға, Қырғызстан 70-ші орынға, Өзбекстан 76-ші орынға тұрақтады.

Айгүл БАЙЖҰМАҚЫЗЫ

Оқи отырыңыз